Gen 12 | PMA | STEP | En avong tai, Iahova viteni min Ebram vit, “Kimea ran out onom, onom keil, ka teim sen tata onom. Kiha en out tai koa inau, nitie minuk.

Genesis 12

Ahi Vise Ebram Vousili

Senesis 12:1-7; 13:5-6,9-18

1 En avong tai, Iahova viteni min Ebram vit, “Kimea ran out onom, onom keil, ka teim sen tata onom. Kiha en out tai koa inau, nitie minuk. 2 Mukonek, nisakin vatiamal onom hehi houlu mok, hemai hehi mari vangi meatin tai en out netan. Nitokol katuk ka numon isom heka vasi out ka meatin keil ilonglong eni. Ka heka enuk, tokolkatien onak heha min meatin keil ten out netan.

3 Koakeil asan selusien ten tokolkatien minuk,
inau nisan tokolkatien min keil.
Ka koakeil asesenda enuk,
numoni hetisa en keil.
Ka keik kihi sise ten tokolkatien onak
vaha min vatiamal keil vasi ten out netan.”
4 Sakini, navong Ebram long kat ren Iahova ka mea ran out Haran, sua onen rokol hanumau etel ka teindan elim (75). 5 Ebram kur ahin onen, isen 'Serae'. Ka titan tunali mun musili, isen 'Lot'. Tounah vasi keil oneatel ral min eisisil keil ka tirendan keil emun eseatel koa tellei kati en out Haran avi houlu ramat. Ka tounah vasi, telsak meseni keke avakuri. Navong asak mesen tounah keil evus, amual avaha en out Kenan.

Avong telrokol out Kenan, 6 Ebram ka meatin keil onen aka pas kantri enek va vio ... umai en out koa avise en 'Sekem'. Ka en out enek, en out koa avise en 'Moraeah', amumon votevav keil one vesesal en mari vatiai tai koa matu vis matu, out koa meatin sav keil umot min ahi keil one ien. (En avong koanek, koakeil ten out Kenan avi horetan veah en out enek.) 7 Evus, Iahova mai kistal ven Ebram ka viteni mini vit, “Atan ten out enek, nisani min koakeil ika en vatiamal onom.” Evus, Ebram kur mari ahat keil ka mumon ahor ten sanien keke vanit sanien votut vahina min Iahova koa mai kistal veni.